Talaba va o‘quvchilar uchun qishki ta'til 20 dekabrdan boshlanadi. Ular bugundan imtiyozli yo‘l chiptalarini xarid qilishi mumkin

Опубликовано 06.12.2019 968 0

Talabalar va o‘quvchilar uchun qishki ta'til kunlari belgilandi. Bu haqda Oliy va o‘rta maxsus ta'lim vazirligi rasman xabar berdi.

Ma'lum qilinishicha, oliy ta'lim muassasalari talabalari va akademik litsey hamda professional ta'lim muassasalari o‘quvchilariga 2019-2020 o‘quv yili qishki ta'til davri 2019 yil 20 dekabrdan 2020 yil 6 yanvargacha etib belgilangan.

«2019 yilning 22 dekabrida O‘zbekiston Respublikasi Oliy Majlisi, xalq deputatlari viloyat, tuman va shahar Kengashlariga umumxalq saylovlari o‘tkazilishi munosabati bilan talabalar va o‘quvchilarning o‘zi doimiy ro‘yxatdan o‘tgan yashash joyida ovoz berishlari uchun qishki ta'til muddati o‘zgartirildi. 

Bu haqda tegishli qaror O‘zbekiston Respublikasi Bosh vaziri o‘rinbosari raisligida bo‘lib o‘tgan yig‘ilishda qabul qilindi», deyiladi vazirlik xabarida. 

Shuningdek, Qoraqalpog‘iston Respublikasi va viloyatlarga ketadigan talaba va o‘quvchilarning qishki ta'til paytida doimiy yashash joylariga borib-kelishlari uchun qulayliklar yaratish maqsadida joriy yilning 16 dekabridan 22 dekabr kuniga qadar hamda 2020 yilning 1 yanvaridan 6 yanvariga qadar 50 foiz chegirma asosida yo‘l chiptalari sotuvini yo‘lga qo‘yiladi. 

Talabalar va o‘quvchilar 5 dekabr kunidan imtiyozli yil chiptalarini xarid qilishlari mumkin. 

«O‘zbekiston temir yo‘llari» AJ, «Uzbekistan airways» AJ hamda Transport vazirligi tomonidan talaba va o‘quvchilar uchun qo‘shimcha joylar soni ko‘paytiriladi, uch kun muddatda oliy ta'lim muassasalari rahbariyati tomonidan tavsiya etilgan joylarda sayyor kassalar tashkil etiladi. 

Qishki ta'til davomida OTMlar, akademik litsey va kasb-hunar kollejlarida mavjud bo‘lgan barcha to‘garaklar, sport-sog‘lomlashtirish bo‘limlari, seksiyalari va klublari to‘liq faoliyat ko‘rsatadi.

2020 yil 6 yanvar - dushanba o‘qishning birinchi kuni etib belgilangan.